Kopia honek Zeusen Aldarea dekoratzen zuen Pergamoko (Turkia) Gigantomakiaren Frisoaren zati bat erreproduzitzen du. Gigantomakia greziar munduko borroka mitologiko garrantzitsuena zen, Olinpoko jainko-jainkosak Erraldoiekin aurrez aurre jarri zituena. Zeusen Aldarea, berriz, tenplu bat izan zen, Pergamo hiriko akropoliko edo goialdeko terrazetako batean eraikia. Haren erdigunean, kolomadi batek inguratua, tenpluak aldare handi bat zuen sakrifizioak erretzeko. Friso dekoratiboak, bi metro baino gehiago altu eta 100 metro baino gehiago luze, eraikinaren perimetroa dekoratzen zuen.
Frisoko multzoa adierazkortasunagatik nabarmentzen da. Figurak olatuen erritmoan mugitzen ari direla dirudi guduaren harrabotsaren erdian. Gorputzak puztu egiten dira, anatomia esajeratu, eta kontserbatzen diren Erraldoien aurpegiek garaitu egin dutela dakienaren larrimina adierazten dute bete-betean. Friso hau aro helenistikoko Pergamoko estilo barrokoaren eredutzat jotzen da. Eredu horri jarraituz zizelkatuko ziren, geroago, Samotraziako Garaipena eta Laokoonen multzoa ere.
Erdian Atena ikusten da, Nike, Garaipena, ondoan duela, hegan. Atena Alizioneo hiltzen ari da, Erraldoietako bat. Eskuinaldean, lurretik jalgitzen, Gea ageri da, Erraldoien ama, eta badirudi eskua luzatzen ari dela seme hilzorikoarengana, azken agurreko keinu atsekabetuan. Hala Atena nola Gea, biak identifikatzen dituzten ezaugarriz hornituta daude. Lehena guztiz armatuta dago, eta bular gainean Medusaren burua dauka; bigarrenak, Lurraren jainkosa gisa, fruituz betetako adar bat dauka ezkerrean.